Vo de Röschti zum Dal

Ich stuune mängisch sälber was wie und wo mir de Thermi überall hilft. Drum verzell ich immer vom Multitalent:
  • Suurteig: de isch jetzt scho 1 Jahr alt und well de ja regelmässig gfüetteret werde will, bin ich so froh isch d'Waag vom Thermi immer parat und uf eis Gramm gnau.
  • Pizza isch natürlich für e ganz sponti Menüwahl immer super. De Teig isch so schnäll gmacht will ja s'Rezäpt grad am Thermigrät parat isch. Hefe isch eh immer vorrätig...
  • Gmües-Schnägge: Ich han ohje en Blätterteig wo muess bruucht si. (das isch sit 7 Jahr no de einzig Teig wo ich chaufe, well er mir chli z ufwändig isch zum sälbermache...) Ich wett aber nöd eifach langwiligi Gipfeli o.ä. mache, sondern öppis Nöis! Ich han no Gmües also: cookidoo spöizt mir GmüesSchnägge use, han nöd ganz alli Zuetate aber improvisiere gaht immer.
  • LinsenDal: es Rezäpt wo vo zwei au uf vier Portione erhöht werdä chan. Zwei langet aber vorig für mich allei, bin nämlich die Einzig wo Linse isst. Meeega fein, hätt Rasse wells ja CurryPaste drin hätt. Natürlich mach ich alles mit und i eim Topf: vim Zwieble, Chnobli, Peperoni und Rüebli verchlinere, zum dämpfe und gare.
  • Bananequark: Banane sind am schwarz werdä und ich han grad no Quark...tataaaaa, der Thermi mixt und rüehrt mir das scho... "isch no fein" händs gseit-..... (suscht han ich mir überleit d'Banane in Schiebe zschnide und in Gfrürer ztue, damit ich dänn wänns emal warm wird da i de Schwiz, es schnälls Bananeglace mache chan.
  • Suurteigbrot: mit mim Suurteig mach ich regelmässig drü Freestyle Buurebrot, eis dörf immer zu de Schwiegereltere... isch vill besser für d'Verdauig.
  • Öpfelwähe: früehner wo ich de Chuecheteig no kauft han isch i de Verpackig immer es Währerezäpt debi gsi. Das chan ich no hütt uswändig und mach de Guss natürlich im Thermi. Aber der Chuecheteig/Mürbeteig mach ich natürlich nur no sälber.
  • Spargelrisotto:  hey es isch soooo fein und ich muess nöd am Chochherd stah und langwilig umerühre...(MIT LINKSLAUF dänn schnits s'Mässer nöd und sogar Spargelspitze blibet ganz) i derä Zit mach ich de Salat oder suscht öppis....
  • Spaghetti: Ja, Teigware mach au ich no uf em Chochherd. Aber mängisch.... wänn ich z.B. no wett glettä zur gliiche Zit.... tuen ich d'Mässerabdeckig und s'Wasser in Topf, erhitze - ich gan go glettä  (er rüeft und stellt ab wänn er fertig isch) und dänn Spaghetti dri. Sanft rüehre tuet er und ich chan witer glettä....
  • Gugelhopf alias Muffins: Ja, wänn min Sohn Luscht hätt zum öppis mache, dänn meischtens Muffins. Ab und zue macht er drus en Cake oder Gugelhopf. Dasmal händ mir idealerwis de Sensor für d'Kerntemparatur gnutzt um es ideals Resultat überzcho.
  • Röschti: Ja, und min Sohn hätt au sehr gern Röschti. Mit de nöie 4in1 Riibi tuet er natürlich jetzt mit em Thermi d'Härdöpfel raffle! Alles mit eim Grät!